ಇವರದ್ದು ಕೇವಲ ಮಾತು ಮಾತ್ರವಲ್ಲ- ತಮಿಳುನಾಡಿನ ಈ ಹಳ್ಳಿಗಳಲ್ಲಿ ಪಟಾಕಿ ಸದ್ದೇ ಇಲ್ಲ..!

ಪರಿಸರ ಸಂರಕ್ಷಣೆ ನಮ್ಮೆಲ್ಲರ ಜವಾಬ್ದಾರಿ ಆಗಿದೆ. ಪರಿಸರಕ್ಕೆ ಉಂಟುಮಾಡಿದ ಹಾನಿಯಿಂದಾಗಿ ಇವತ್ತು ದೊಡ್ಡ ದೊಡ್ಡ ಸಂಕಷ್ಟಗಳು ಎದುರಾಗುತ್ತಿದೆ. ದೆಹಲಿಯಂತಹ ಮಹಾನಗರಗಳಲ್ಲಿ ವಾಯುಮಾಲಿನ್ಯದಿಂದಾಗಿ ಉಸಿರಾಟ ನಡೆಸಲು ಕೂಡ ಕಷ್ಟವಾಗುವಂತಹ ಸ್ಥಿತಿ ಎದುರಾಗಿದೆ. ಆದ್ರೆ ತಮಿಳು ನಾಡಿನ ಈ 8 ಗ್ರಾಮಗಳು ಪರಿಸರದ ಬಗ್ಗೆ ಇಟ್ಟುಕೊಂಡಿರುವ ಕಾಳಜಿ ಎಲ್ಲರಿಗೂ ಮಾದರಿ.

ತಮಿಳುನಾಡಿನ ಈರೋಡ್ ಜಿಲ್ಲೆಯಲ್ಲಿರುವ 8 ಗ್ರಾಮಗಳು ಕಳೆದ 17 ವರ್ಷಗಳಿಂದ ದೀಪಾವಳಿ ಹಬ್ಬದ ಸಮಯದಲ್ಲಿ ಪಟಾಕಿ ಸಿಡಿಸುವುದನ್ನೇ ಬಿಟ್ಟು ಬಿಟ್ಟಿದ್ದಾರೆ. ಹತ್ತಿರದಲ್ಲೇ ಪಕ್ಷಿಧಾಮ ಇರುವುದರಿಂದ ಇವರು ಪಟಾಕಿ ಸಿಡಿಸದೇ ಇರುವ ನಿರ್ಧಾರ ಮಾಡಿದ್ದಾರೆ. ವೆಲ್ಲೋಡೆ ಅನ್ನುವ ಪಕ್ಷಿಧಾಮದ ಸುತ್ತಮುತ್ತಲಿರುವ 8 ಗ್ರಾಮಗಳು ಪಟಾಕಿ ಸಿಡಿಸುವುದನ್ನು ಮರೆತೇ ಬಿಟ್ಟಿವೆ. ಪಟಾಕಿಯಿಂದ ಹೊರಬರುವ ಸದ್ದುಗಳು ಪಕ್ಷಿಗಳನ್ನು ಭಯಪಡಿಸುತ್ತವೆ. ಅವುಗಳು ಊರು ಬಿಟ್ಟು ಹೋಗುವ ಸಾಧ್ಯತೆ ಇರುತ್ತದೆ ಮತ್ತು ಪರಿಸರಕ್ಕೂ ಹಾನಿಯಾಗುತ್ತದೆ ಅನ್ನುವ ದೃಷ್ಟಿಯಿಂದ ಪಕ್ಷಿಧಾಮದ ಸುತ್ತಮುತ್ತ ಇರುವ ಗ್ರಾಮಸ್ಥರು ಪಟಾಕಿಗೆ ಗುಡ್ ಬೈ ಹೇಳಿದ್ದಾರೆ.

---

ವೆಲ್ಲೋಡೆ ಪಕ್ಷಿಧಾಮ 1996ರಲ್ಲಿ ಸ್ಥಾಪನೆಯಾಗಿತ್ತು. ಸುಮಾರು 80 ಹೆಕ್ಟೇರ್ ಪ್ರದೇಶದಲ್ಲಿ ಈ ಪಕ್ಷಿಧಾಮವಿದೆ. ಇದರ ಸುತ್ತಮುತ್ತಲಿರುವ 8 ಹಳ್ಳಿಗಳಲ್ಲಿ ಸುಮಾರು 750 ಕುಟುಂಬಗಳು ವಾಸ ಮಾಡುತ್ತಿವೆ. ಸೆಪ್ಟಂಬರ್ ನಿಂದ ಡಿಸೆಂಬರ್ ತನಕ ವೆಲ್ಲೊಡೆ ಪಕ್ಷಿಧಾಮಕ್ಕೆ ಹಲವು ಹಕ್ಕಿಗಳು ವಲಸೆ ಬರುತ್ತವೆ. ದೀಪಾವಳಿ ಹಬ್ಬ ಕೂಡ ಇದೇ ಸಮಯದಲ್ಲಿ ಬರುತ್ತದೆ. ಹೀಗಾಗಿ ಪಟಾಕಿ ಸಿಡಿಸಿದ್ರೆ ಹಕ್ಕಿಗಳ ಪ್ರಾಣಕ್ಕೆ ಅಪಾಯವಾಗುತ್ತದೆ ಅನ್ನುವ ದೃಷ್ಟಿಯಿಂದ ಈ ಗ್ರಾಮಸ್ಥರು ಪಟಾಕಿ ಸಿಡಿಸದೇ ಇರುವ ನಿರ್ಧಾರ ಕೈಗೊಂಡಿದ್ದಾರೆ. ತಲಕಾರೈ, ದೊಡ್ಡಕೊಂಬೈ, ಸೊಲಗಾನೈ, ಸುಂದಾಪುರ್, ಕಥಿರಿಮಲೈ, ಕಕ್ಕಾಯನುರ್ ಮತ್ತು ನಾಥಡಿ ಗ್ರಾಮಗಳು ಈ ಪಕ್ಷಿಧಾಮದ ಸುತ್ತಮುತ್ತಲಿವೆ. ಇದರ ಜೊತೆಗೆ ಸತ್ಯಮಂಗಲಂ ಮತ್ತು ಹಾಸನೂರು ಹುಲಿ ರಕ್ಷಿತಾರಣ್ಯ ಪ್ರದೇಶ ಕೂಡ ಈ ಗ್ರಾಮಗಳ ಹತ್ತಿರಕ್ಕಿದೆ. ಹೀಗಾಗಿ ಪಟಾಕಿ ಅಂದ್ರೆ ಈ ಊರಿನ ಜನಕ್ಕೆ ಅಲರ್ಜಿ.

ಇದನ್ನು ಓದಿ: ಒತ್ತಡವಿಲ್ಲದ ಕೆಲಸ- ಕೈ ತುಂಬಾ ಸಂಬಳ- ನೆಮ್ಮದಿಯಾಗಿ ಸಮಯ ಕಳೆಯುವ ಬಗ್ಗೆ ಯೋಚನೆ ಮಾಡಿ

ವೆಲ್ಲೊಡೆ ಪಕ್ಷಿಧಾಮಕ್ಕೆ ಸೆಪ್ಟಂಬರ್​ನಿಂದ ಡಿಸೆಂಬರ್ ನಡುವೆ ಆಸ್ಟ್ರೇಲಿಯಾ, ನ್ಯೂಜಿಲೆಂಡ್ ಸೇರಿದಂತೆ ಹಲವು ಕಡೆಗಳಿಂದ ಪಕ್ಷಿಗಳು ವಲಸೆ ಬರುತ್ತವೆ. ಇದೇ ಸಮಯದಲ್ಲಿ ಪಕ್ಷಿಗಳ ಸಂತಾನಾಭಿವೃದ್ಧಿ ಕೂಡ ನಡೆಯುತ್ತಿರುತ್ತದೆ.

“ನಾವು ದೀಪಾವಳಿ ಹಬ್ಬದ ಸಮಯದಲ್ಲಿ ಪಟಾಕಿ ಸಿಡಿಸಿ ಸಂಭ್ರಮಿಸುತ್ತಿದ್ದೆವು. ಆದ್ರೆ ಈ ಪಕ್ಷಿಧಾಮ ಆರಂಭವಾದ ದಿನದಿಂದ ಪಟಾಕಿ ಸಿಡಿಸುವುದನ್ನೇ ಬಿಟ್ಟಿದ್ದೇವೆ. ಬುದ್ಧಿವಂತರಾಗಿರುವ ಮನುಷ್ಯರಿಗೆ ಯೋಚನೆ ಮಾಡುವ ಶಕ್ತಿ ಇದೆ. ಮೂಕ ಪಕ್ಷಿಗಳಿಗೆ ಮತ್ತು ಪ್ರಾಣಿಗಳಿಗೆ ತೊಂದರೆ ಕೊಡಲು ನಮ್ಮ ಗ್ರಾಮಸ್ಥರು ಇಷ್ಟಪಡುವುದಿಲ್ಲ”

- ಚಿನ್ನಸ್ವಾಮಿ ಗೌಂಡರ್, ಪಕ್ಷಿಪ್ರಿಯ

ಪಕ್ಷಿಧಾಮದ ಸುತ್ತಮುತ್ತಲಿನ ಗ್ರಾಮಸ್ಥರು ಇಲ್ಲಿಗೆ ಬರುವ ಪಕ್ಷಿಗಳನ್ನು ತುಂಬಾ ಪ್ರೀತಿ ಮಾಡುತ್ತಾರೆ. ಇಲ್ಲಿನ ಮಕ್ಕಳು ಕೂಡ ಪಟಾಕಿ ಬಗ್ಗೆ ಆಸಕ್ತಿ ಹೊಂದಿಲ್ಲ. ಒಟ್ಟಿನಲ್ಲಿ ತಮಿಳುನಾಡಿನ ಈ ಗ್ರಾಮ ತನಗೆ ಗೊತ್ತೇ ಇಲ್ಲದೆ ಪರಿಸರದ ಸಂರಕ್ಷಣೆಯನ್ನು ಮಾಡುತ್ತಿದೆ.

ಇದನ್ನು ಓದಿ:

1. ಕನ್ನಡಿಗರನ್ನು ಬಡಿದೆಚ್ಚರಿಸಿದ ಕನ್ನಡ ಡಿಂಡಿಮ ವೀಡಿಯೋ

2. ಸಮುದ್ರ ಸ್ವಚ್ಛಗೊಳಿಸಲು ನೆದರ್ಲೆಂಡ್ ಯುವಕನ ಹೊಸ ಅನ್ವೇಷಣೆ

3. 200 ಗರ್ಭಿಣಿಯರ ಜೀವ ಉಳಿಸಿದ ಆಪತ್ಬಾಂಧವ..